प्रतिभावान वाघचवरे बंधू

प्रतिभावान वाघचवरे बंधू 

 'फोरेन्सिक ओडोन्टोलॉजी' या फारशा ज्ञात नसलेल्या विषयाचा अभ्यास असलेले डॉ. सत्यजित वाघचवरे आणि चंदिगढमध्ये 'टफमॅन' ठरलेले डॉ. अभिजित हे आंतरराष्ट्रीय ख्यातीचे त्यांचे बंधू ही अक्षरशः अफलातून प्रतिभा असलेली व्यक्तिमत्वे आहेत.

गड-किल्ल्यांवरची चढाई असो किंवा मॅरेथॉनसाठी धावणं; सोलापूरातील डॉ. सत्यजित आणि डॉ. अभिजित वाघचवरे यांचा त्यात उत्साहवर्धक सहभाग असतो. सोलापूरात 'सायक्लोथॉन' रुजवणारे हे दोघे डॉक्टरबंधू आपापल्या क्षेत्रात नामवंत आहेत. बोलता बोलता दंतरुग्णाच्या वेदना कमी करणारे दंतवैद्य डॉ. सत्यजित हे आगळे व्यक्तिमत्व आहे. तर अस्थिरोग तज्ज्ञ म्हणून लौकिक असलेल्या डॉ. अभिजित यांनी मॅरेथॉनच्या माध्यमातून आपल्या नावाचा डंका सातासमुद्रापार पोचवला आहे. अलीकडेच त्यांनी चंदिगढ येथील 'टफमॅन' स्पर्धेत महाराष्ट्रात प्रथम आणि राष्ट्रीय स्तरावर पाचवे स्थान मिळवून आपला लौकिक वाढवला आहे.

डॉ. सत्यजित वाघचवरे 'डेंटिस्ट' म्हणून केवळ उपचारच करतात असे नाही, तर त्यांनी दातासंबंधी विशेष संशोधन केले आहे. त्याबाबत लेखनही केलं आहे. आपल्या देशात बऱ्याचदा भीषण अपघात होतात. त्यावेळी मृतदेहांची ओळख पटवणे ही मोठी जिकिरीची आणि भावनिक गोष्ट झालेली असते. डीएनए किंवा अन्य चाचण्या घेणेही कठीण असते, तेव्हा नेमकं काय करावं याविषयी ते सांगतात, ''दात ही व्यक्तीची खरी ओळख असते. ज्यावेळी डीएनए चाचणी घेणे शक्य नसते तेव्हा दाताची ठेवण, दातांचे अवशेष सबळ पुरावा म्हणून विचारात घेता येऊ शकतात. दातांवरून, दातांच्या रचनेवरून, दातांच्या फोटोग्राफ-एक्स-रे वरून, दातांवर केलेल्या इलाजांवरून एखाद्या व्यक्तीची ओळख पटवून देता येते. कारण दात हा शरीरातील सर्वात टणक अवयव आहे. त्याचे विघटन होणे तसे खूप अवघड असते. आपण वाचले ऐकले किंवा पाहिलेही असेल इजिप्तमधल्या ‌‌'ममी‌‌'चे दात आजही आहेत्याच स्वरूपात शाबूत आहेत. याचाच अर्थ दात कित्येक वर्षे न कुजता राहू शकतो. म्हणूनच दातांची रचना ही एखाद्या व्यक्तीची ओळख असते.''

फोरेन्सिक ओडोन्टोलॉजी हा अत्यंत महत्त्वाचा मुद्दा डॉ. सत्यजित यांनी अभ्यासला आहे आणि त्याबाबत सर्वसामान्यांना समजेल अशा भाषेत लेखन केले आहे. झोपेतून उठल्यानंतर मुखमार्जनाची आवश्यकता का असते इथेपासून ते दात कसे स्वच्छ करायचे याविषयी त्यांनी मार्गदर्शन केले आहे. बरेच लोक ब्रशने दात घासताना फरशी घासल्याप्रमाणे जोर लावतात, परिणामी त्यांचे दात झिजतात, वाकडे होतात आणि पुढच्या काळात त्यांना त्रास होऊ शकतो, याविषयी डॉ. सत्यजित आपल्या रुग्णांशी करीत असलेला संवाद अक्षरशः श्रवणीय असतो.

सतत सात तास वीस मिनिटे वेगवेगळ्या प्रकाराने स्वतःच्या शरीराला कष्ट देणं ही सामान्य गोष्ट नाही. सुरूवातीला १.९ किलोमीटरचे स्वीमिंग, त्यानंतर ९० किलोमीटरचे सायकलिंग आणि त्यानंतर लगेच २१ किलोमीटर धावणे ही सर्वसामान्यांच्या आवाक्याबाहेरची गोष्ट आहे. त्यासाठी शरीर आणि मन, प्रबळ असणं गरजेचं असतं. त्यासाठी सहा महिने सतत कठोर परिश्रम, रोजचा सराव आणि त्यानुसार आहार ही खरं तर एक तपश्चर्याच म्हणावी लागेल. आंतरराष्ट्रीय दर्जा काय असतो, त्याचा प्रत्यय डॉ. अभिजित यांनी दाखवून दिला आहे. यापूर्वी आयर्न मॅनचा किताब त्यांनी संपादन केला आहे, याखेरीज दक्षिण आफ्रिकेतील ९० किलोमीटर धावण्याची 'कॉमरेड्स मॅरेथॉन' त्यांनी पूर्ण केली आहे. चंदिगढच्या विजयामुळे ते आता 'टफमॅन' ठरले आहेत. त्यांना त्यांचे बंधू डॉ. सत्यजित यांच्याप्रमाणेच डॉ. राजश्री आणि डॉ. शुभांगी वाघचवरे यांचेही पूर्ण सहकार्य मिळते. संपूर्ण वाघचवरे कुटुंबच समाजसेवेच्या ध्यास घेतलेले आहे. शेती, वैद्यकीय व्यवसाय, मॅरेथॉनसारख्या स्पर्धांचे आयोजन, तरुणांकडून त्यासाठी तयारी करून घेणे, देशविदेशात ट्रेकिंग आणि तत्सम कारणासाठी दौरे अशा नानाविध उपक्रमात हे सारे कुटुंब रंगून गेले आहे.

०००