आई-बाबा मला वेळ द्या....

एके दिवशी मी आईला विचारलं, "आई, बाबांना पगार किती आहे?" तर आई माझ्या अंगावर ओरडलीच,म्हणाली, " काय करायच्यात तुला नसत्या चौकशा?"

मी मग गप्पच बसले. आई तिच्या तिच्या कामात मग्न झाली.

मी मग बाबांची वाट बघत बसले. रात्री उशिरा कधी तरी बाबा आले, पण मला झोप लागली होती.

आईला काही विचारायला जावं, तर तिचे फोन, तिच्या क्लबच्या मीटिंग्ज, शॉपिंग. एक ना दोन.आमच्या घरी काम करणाऱ्या मावशीच माझं सगळं करतात. मला खूपदा वाटतं, आईनं माझे लाड करावेत, बाबांच्या गळ्यात हात घालून त्यांना प्रश्न विचारावेत. पण बाबा मी उठायच्या आत लवकर जातात आणि मला झोप लागल्यावर येतात. पैसे मिळवण्यासाठी तेवढं काम करावंच लागतं म्हणे.

एकदा मी बाबा येईपर्यंत जागत बसले. बाबांना विचारलंच, " इतकं काम करता तुम्ही, तुम्हाला पैसे किती मिळतात. रोजचे?"

"हजारो मिळतात चूप,?" असं म्हणून त्यांनी मला गप्प केलं.

महिनाभर मी खाऊचे पैसे साठवले. पुन्हा एकदा जागून बाबांना भेटले. म्हणाले, "बाबा, माझ्याकडं ५०० रूपये आहेत. तेवढे घ्या आणि तेवढ्यात तुमचा जेवढा वेळ मिळेल तेवढा मला द्या?"

बाबा थोडं रागावले. मग गप्पगप्प झाले. त्यांनी आईला बोलावलं. मी पाचशे रूपये देऊन त्यांचा वेळ मागतेय, असं म्हणाले. थोडावेळ दोघेही शांत राहिले. मग आधी बाबांनी मला उचलून माझे पापे घेतले.मग आईनं....!

"असं का केलंस?", आईनं मला विचारलं.

"मग मी काय करू. माझ्याशी बोलायला तुमच्याकडं वेळच नव्हता. सकाळी उठल्यावर आपल्या बागेतलं उमललेलं फूल मला तुम्हाला दाखवायचं असतं. पण आई, तू माझ्यामागं शाळेला उशीर होईल म्हणून ओरडत असतेस. मला डब्यात भाजी पोळी हवी असते, तसं तुला सांगावं तर डबा मावशीच करतात. रोज रोज सँडवीच खाऊन कंटाळा येतो ना मला....! मला मांजर खूप आवडते, असं नुसतं म्हणाले तर किती वस्सकन् ओरडलीस आई तू माझ्यावर. बाबा, आई असं रागावते म्हणून तुम्हाला सांगायचं होतं. पण कितीतरी दिवस आपली भेटच नाही झाली. तुम्ही पैसे मिळवण्यासाठी दिवस-रात्र काम करता. म्हणून माझ्या वाटेचा वेळ मी पैसे देऊन विकत घेतला तुमच्याकडून. मला टीव्हीवरचे तेच तेच कार्यक्रम बघायला आवडत नाहीत. मला बाबांच्या पाठीवर बसून घोडा घोडा खेळायचं असतं. शेजारचा गणू त्यांच्या बाबांच्या खांद्यावर बसून गणपतीचा देखावा बघायला गेला होता. मला तसं तुमच्या खांद्यावर बसायचं होतं. बाबा,तुम्ही खांद्यावर घेतल्याशिवाय मला दूरचं जग दिसणार कसं? सांगा ना? घटकचाचणी परीक्षेत मला गणितात पैकीच्या पैकी मार्क्स मिळाले. वर्गात सगळ्यांनी माझं कौतूक केलं. आई, तुला हे सांगायला आले तर , 'सरक ग तिकडं, वेळ नाही मला', असं म्हणून ढकलून दिलंस. मी त्यादिवशी जेवले नाही. तर तू मावशींना नाही तसलं बोललीस. माझ्या न जेवण्याचं कारण तू होतीस, पण मावशींवर तू ओरडलीस.माझ्या पाठीवर हात ठेवून फक्त एकदा जरी मला 'जेव गं राणी' म्हणाली असतीस तर मी उड्या मारत जेवले असते. मला बागेत फिरावं वाटतं. आपल्या फुलझाडांना पाणी द्यावं वाटतं. पण अंगाला माती लागेल म्हणून आई तू मला तिकडं फिरकू देत नाहीस. व्हिडीओ गेम किंवा मोबाईल टॅबपेक्षा मला छान छान गोष्टींची पुस्तकं वाचायला आवडतात. पण सारखी सारखी नवी पुस्तकं कुठून आणायची म्हणून तू मला शंभर गेमची सीडी आणलीस. मला स्वयंपाक करायला आवडतं, काडेपेटीवरील छापांचा संग्रह करायला आवडतं. पण बाबा, 'ही कसली भिकारडी थेरं' म्हणून तुम्ही माझे सगळे छाप फेकून दिले. मला काय आवडतं, हे एकदा तरी विचारलंत का मला? मी चुकले तर जरूर शिक्षा करा, पण माझं चुकतंय हे पाहण्यापुरता तरी मला वेळ द्या. बाबा, माझ्या वाढदिवसाला महागडी खेळणी पाठवता तुम्ही. मला खेळणी नको, पिझ्झा नको, सिेनेमा नको. फक्त तुमचं बोट हातात धरून फिरायला जायचं होतं मला.माझ्या मैत्रिणींना मला दाखवायचं होतं, 'बघा, माझ्या बाबांना माझ्यासाठी वेळ आहे, आम्ही फिरायला बाहेर पडलोय...' आई-बाबा, मला तुमच्याकडून दुसरं काही नको, आपण एकत्र जेवायला बसूया. आई,शॉपिंगला जाताना मला कधीतरी मलाही ने. म्हणजे वस्तूंचे भाव कसे करायचे असतात ते मला कळेल.एकदा रात्री उशिरा दोघं जोरजोरात भांडत होतात. माझी झोपमोड झाली. इतके पैसे मिळवूनही तुमचं भांडण पैशावरूनच होतं, असं झोपेत मी ऐकलं. एकदा रात्री मला भयानक स्वप्न पडलं. मी किंचाळले.त्यावेळी आई, तुझ्या कुशीत शिरून गुडुप झोपायचं होतं मला. जाऊ दे. आता तुम्ही दोघांनी मला वेळ दिलाय. माझं ऐकून घेताय. आणि मी वेड्यासारखी, तुमच्या तक्रारी काय सांगतीय. आई-बाबा, आता जसा मला वेळ दिलात ना, तसाच वेळ कायम द्या. द्याल ना?"